په کندهار کې سیمهییزې سرچینې وايي چې په دغه ولایت کې د یو ناچاوده لاسي بم چاودنې د یو ماشوم ژوند اخیستی دی.
دا پېښه پرون جمعه د کب پر ۱۸مه د کندهار په پنجوايي ولسوالۍ کې شوې ده.
وژل شوی ماشوم بلال احمد نومېده.
سرچینې زیاتوي چې په دې پېښه کې د یو ماشوم په ګډون دوه ښځې ټپيانې شوې هم دي.
پېښه هغه مهال شوې چې بلال لاسي بم موندلی او کور ته یې وړی دی.
په کندهار کې د طالبانو امنیې قوماندانۍ هم د پېښې پخلی کړی دی.
له جګړو پاتې وسلې او مرمۍ وخت نا وخت د هېواد په بېلابېلو سیمو کې خلکو ته مرګ او ژوبله اړولې ده.
د یادونې ده چې روانه میاشت د غزني مرکز اړوند په ارزو کلي کې د یوې هاوان مرمۍ چاودېدو د یو ځوان ژوند اخیستی و.
