په خوست د تېر حکومت د امنيتي ځواکونو پر يوه غړي د طالبانو امنيتي پوستې ته نږدې وسلهوال برید شوی او وژل شوی دی.
سرچینې رسنی ته ویلي چې دغه پخوانی سرتېری پنجشنبه د کب پر ۱۷مه د خوست په مرکز کې وژل شوی دی.
دا پخوانى سرتېرى نادر جبارخېل نومېده او څه موده يې د ټنیو ولسوالۍ د امنيه قوماندان په توګه دنده ترسره کړې وه.
سرچينې زياتوي چې د یاد پخواني سرتېري پر موټر د برید پرمهال له نوموړي سره د کورنۍ غړي هم وو چې په پايله کې يې د يوې مېرمنې په ګډون دوه کسان ټپيان شوي دي.
سرچينه ټینګار کوي چې دغه بريد د طالب جنګیالیو د سترګو پر وړاندې وشو؛ خو بريدکوونکي له سيمې تښتېدلي او د نيولو لپاره يې کوم اقدام نه دى شوى.
طالبانو تراوسه د دې پېښې په هکله څه نه دي ویلي.
دا په داسې حال کې ده چې تېره پنجشنبه شپه د کب پر ۱۷مه د فارياب په المار ولسوالۍ کې د تېر حکومت د ولسي پاڅونکوونکو يو قوماندان ناپېژاندو وسلهوالو وواژه.
