په افغانستان کې د ملګرو ملتونو مرستندویه پلاوي (یوناما) په غزني کې د طالبانو له لوري د دوو کسانو قصاص ته په غبرګون کې ویلي چې په کلکه توګه د اعدام له سزا سره مخالف دي.
یوناما پنجشنبه د کب پر ۳مه په خپله ایکسپاڼه کې لیکلي چې دا موضوع د ژوندانه له بنسټيز حق سره په ټکر کې ده.
دغه بنسټ له طالبانو غوښتي چې د اعدام سزا د لرې کولو لپاره ګام پورته کړي.
دا په داسې حال کې ده چې د طالبانو سترې محکمې په یوې خبرپاڼه کې په غزني کې پر دوو نارینهوو د «قصاص حکم» د پلي کېدو خبر ورکړی دی.
دا حکم د طالبانو مشر ملا هبتالله اخوندزاده له تایید وروسته د غزني مرکز اړوند د «علي لالا» کلي د فوټبال په لوبغالي کې اجرا شوی دی.
ځايي سرچینې وايي چې دا دوه کسان په قتل تورن و چې هر یو یې «پنځه مرمۍ» ویشتل شوی دی.
د طالبانو سترې محکمې ویلي چې په قتل تورن هر یو سېدجمال د سېدمحمود زوی د میدان وردک د سېداباد ولسوالۍ او ګلخان د شاهولي زوی د غزني د اندړو ولسوالۍ اوسېدونکي و.
