په نورستان کې ځايي سرچينې وايي چې په دغه ولايت کې د ځمکې ښويېدنې له امله لږترلږه لس کسان وژل شوي دي.
سرچینې رسنی ته منلې چې دغه پېښه یکشنبه، د سلواغې پر ۲۹ د شپې شاوخوا ۱۲:۳۰ بجې د نورګرام ولسوالۍ په «نکره» دره کې د سختې واورې ورېدو له امله رامنځته شوې ده.
همداراز د دې پېښې په ترڅ کې لږترلږه ۲۵ کورونه ویجاړ شوي دي.
د سرچينې په وینا، په نورګرام ولسوالۍ کې د ځمکې ښويېدنې له امله د اوښتو تلفاتو شمېر وروستی نه دى او احتمال شته چې زيات شي.
طالبانو هم د دغې طبيعي پېښې رامنځته کېدل منلي او ويلي يې دي چې سيمې ته يې د ژغورنې ډلې استولي دي.
تر دې مخکې هم په نورستان ولایت کې ورته پېښې شوې وې.
د يادونې وړ ده چې له دوو ورځو راهيسې د هېواد ګڼ سیمې د بارانونو او واورې شاهدانې دي چې له امله يې د يو شمېر ولايتونو ډېرى ترانسپورتي لارې د ترافيکو پر مخ تړل شوې دي.
