د ملګرو ملتونو د بشري مرستو د همغږۍ دفتر (اوچا) ویلي چې سویس له افغانستان سره ۱.۹ میلیون ډالره مرسته کړې ده.
اوچا یکشنبه د سلواغې پر ۲۹مه په خپله ایکسپاڼه کې له افغانستان سره د سویس له دې مرستې مننه کړې ده.
د اوچا په خبره، سویس دا پیسې د افغانستان بشردوستانه صندوق ته ورکړې دي.
تازه د ملګرو ملتونو د بشري مرستو د همغږۍ دفتر ویلي چې د ۲۰۲۴ زیږديز کال لپاره په افغانستان کې د روغتیايي چوپړتیاوو د وړاندې کولو په موخه په روغتیايي برخه کې د دغه سازمان شریکان ۳۶۷ میلیونو ډالرو ته اړتیا لري.
د اوچا په خبره، دا بودیجه به روغتیايي چوپړتیاوو ته د لاسرسي پر ښه کېدو، د ناروغیو د پراخېدو پر وړاندې د تیاري او غبرګون، رواني روغتیا او د رواني – ټولنیز ملاتړ چوپړتیاوو په ښهوالي او د شدیدې خوارځواکۍ پر مدیریت ولګول شي.
د یادولو ده چې دا مهال افغانان د نورو ناروغیو سربېره، له موسمي او ساري ناروغیو سره هم مخامخ دي.
