سرچینې وايي چې طالبانو په کابل کې د خامه پرېس خبري شبکې خبریال منصور نېکمل له یوې شپې ورځې بند وروسته ازاد کړی دی.
سرچينې یکشنبه ، د سلواغې پر ۲۹مه رسنی منلې چې منصور نېکمل د طالبانو له بنده ازاد او خپل کور ته ستون شوی دی.
تر اوسه دا نه ده روښانه چې هغه د څه په تور د طالبانو له لوري نیول شوی و.
خو یوې بلې سرچینې چې د نوم له ښودلو یې ډډه کړې رسنی ته ویلي، د ښاغلي نېکمل د نیولو لامل، له یوې داسې مېرمنې سره مرکه بلل شوې چې د دې ډلې د پام وړ حجاب یې نه دی رعایت کړی.
طالبانو په دې هکله څه نه دي ویلي.
دا په داسې حال کې ده چې طالبانو په سمنګان کې د پژواک خبري اژانس خبريال سيفالله کريمي په وروستۍ قضيه کې نيولى او دوه ورځې وروسته يې بېرته خوشې کړى و.
طالبانو واک ته له رسېدو راهیسې د رسنیو او خبریالانو پر فعالیتونو پراخ محدودیتونه لګولي او څو ځله یې خبریالان نیولي، بندیان او شکنجه کړي دي.
