په فاریاب، سمنګان او هرات کې ځايي سرچینو په دغو ولایتونو کې د ترافیکي پېښو له امله د دوو طالبانو په ګډون د اوو کسانو د مړینې خبر ورکړی دی.
په فاریاب کې د ترافیکي پېښو مدیر احمدفهیم کوهي وايي چې یکشنبه د سلواغې پر ۲۲مه د دغه ولایت د خواجه سزپوش ولسوالۍ په «بادغیسي» سیمه کې د «کوماز» موټر او موټرسایکل د ټکر له امله دوه ځوانان مړه شوي دي.
نوموړي زیاته کړې، د پېښې قربانیان حجتالله او هدایتالله نومېدل چې هر یوه یې ۱۸ کاله عمر لاره.
له بلې خوا، تېره شپه په سمنګان کې د ترافیکي پېښې له امله درې کسانو ژوند بایللی دی.
په سمنګان کې د طالبانو د ترافیکو مدیریت چارواکي وايي چې د دغه ولایت د خلم ولسوالۍ اړوند په «کفترخانه» ګولايي کې د کرولا او «اکتروز» موټرو د جنګېدو له کبله په کرولا موټر کې سپاره درې کسان مړه شوي دي. مړه شوي کسان د پنجشېر او وردک اوسېدونکي ښودل شوي دي.
ورته مهال، سرچینې وايي چې د هرات په «کازرګاه» سیمه کې د یو موټر د اوښتو له کبله دوه کسان مړه شوي دي.
د پېښو لامل د موټرو ګړندی تګ ښودل شوی دی.
په دې وروستیو کې د هېواد په ډېرو برخو کې د ترافیکي پېښو په کچه کې ډېروالی راغلی دی.
د موټر چلوونکو بې احتیاطي، د سړکونو خرابوالی او له ترافیکي قوانینو ناخبري د دې ډول پېښو اصلي لاملونه بلل کېږي.
اړوندې لیکنې :
- په سمنګان کې د ترافیکي پېښې له امله اووه کسان مړه شوي
- په فاریاب او سمنګان کې د ترافیکي پېښو لامله ۱۰ کسان مړه شوي
- طالبانو په کابل کې د یو پخواني جنرال په ګډون درې کسان نیولي
- په کندهار کې چاودنه؛ د طالبانو د يو قوماندان په ګډون شپږ کسان ووژل شول
- په افغانستان کې د ترافیکي پېښو د زیاتوالي لامل څه دی؟
- د هېواد په درېیو ولایتونو کې د سېلابونو له کبله یوه نجلۍ مړه شوې او ۴۰ کورونه ویجاړ شوي