له هغې وروسته چې څه موده وړاندې د تبیان مرکز مسوول سېدعیسی حسیني مزاري د جمهوریت پر مهال د کابل په لویدیځ کې د سلګونو «فاحشهخانو او کلیساګانو» د شتون ادعا وکړه، طالبانو د نوموړي د احضار امر صادر کړی دی.
سرچینو سهشنبه د سلواغې پر ۱۷مه رسنی ته منلې چې د کابل د لویديځې سیمې د اوسېدونکو له شکایتونو وروسته، د مزاري د احضار حکم صادر شوی دی.
په دشت برچي کې د طالبانو شپږمې امنیتي حوزې په احضارپاڼه کې له حسیني مزاري غوښتل شوي چې «سبا د سهار ۹:۰۰ بجې حوزې ته حاضر شي او د نه حاضرېدو په صورت کې بیا د شکایت حق نه لري.»
پر حسیني مزاري دا شکایتونه د کابل په لویدیځه څنډه کې د ګذر د وکیلانو، د جوماتونو د ملا امامانو او شوراګانو له لوري ثبت شوي دي.
یو شکایت چې رسنی ته رسېدلی پکې راغلي: «سېدعیسی حسیني مزاري په رضوي ښار (د ایران مشهد) کې په ډېرې بې عزتۍ او سپین سترګۍ د کابل د لویدیځې سیمو او د کابل ټولو درنو اوسېدونکو ته د کفر او فحشا نسبت ورکړی دی.»
د سیمې اوسېدونکو په دې شکایت لیکونو کې د حسیني مزاري ادعا «ستر دروغ» او «ناروا تور» بللی او ویلي دي چې نوموړي «پر یو ستر ملت د نه بښلو وړ تورونه لګولي دي.»
حسیني مزاري او هغه پورې تړلي بنسټونو تر اوسه د دغه امر او له نوموړي د خلکو د شکایتونو په اړه څه ویلي نه دي.
د یادونې وړ ده چې سېدعیسی حسیني مزاري دا څرګندونې د لړم میاشتې په وروستیو کې د ایران په مشهد ښار کې د یو شمېر افغان کډوالو په یوې ناستې کې کړې وې.
نوموړي په هغې غونډې کې ویلي و چې طالبانو «په کابل کې ټولې فاحشهخانې او کلیساګانې له منځه وړي دي.»
د نوموړي دې څرګندونو پراخ غبرګونونه راوپارول.
