د بخښنې نړۍوال سازمان د طالبانو د استخباراتو مشر عبدالحق وثیق ته په یوه پرانیستي لیک کې د دې ډلې له زندانه د نجونو د زدهکړو حقونو د دوو فعالانو د خوشې کېدو غوښتنه کړې ده.
د دغه سازمان په هغه لیک کې چې د جمعې ورځ، سلواغې پر ۱۳مه خپره شوی راغلي چې احمدفهیم عظیمي او صدیقالله افغان د ۲۰۲۳ کال د اکټوبر پر ۱۷مه د کابل ښار د کارته چهار سیمه کې د طالبانو د استخباراتو له لوري نیول شوي دي.
د بخښنې نړۍوال سازمان په وینا، دغو دوو د پوهنې د حقونو فعالانو له «فکر بهتر» بنسټ سره کار کاوه.
د دغه لیک پر بنسټ، احمدفهیم او صدیقالله د ډېسمبر پر ۲۷مه د طالبانو د محکمې له لوري محاکمه او د پلچرخي زندان ته ولېږدول شول.
د بخښنې نړۍوال سازمان زياته کړې چې له دغو دوو کسانو سره د طالبانو چلند د بيان د ازادۍ، د سولهييزو غونډو او يوې عادلانه محکمې ته د لاسرسي له حقه چې د نړۍوالو قوانينو له لوري تضمين شوى، ښکاره سرغړونه ده.
د یاد سازمان په وینا، دغو دوو کسانو د طالبانو د ۴۰ استخباراتو د ریاست په زندان کې ۷۲ ورځې تېرې کړې دي.
دغه سازمان د ښځو او نجونو پر زدهکړو د محدودیتونو د لیرې کولو غوښتنه هم کړې ده.
تر دې وړاندې د افغان نجونو د روباټ جوړونې ټیم مشرې رویا محبوب ویلي وو چې طالبانو د دغه ټیم د «DCF» څانګې غړی عظیمي او یو شمېر نور همکاران د «لاریونونو تنظیم او د روباټ جوړونې ټیم له نجونو سره د مرستې» په تور نیولي دي.
