د طالبانو د بهرنیو چارو وزارت ویلي چې د چین ولسمشر شي جنپینګ په بیجینګ کې د طالبانو د سفیر باورلیک منلی دی.
د دغه وزارت ویاند عبدالقهار بلخي سهشنبه د سلواغې پر ۱۰مه په خپله ایکسپاڼه کې لیکلي چې په بیجینګ کې د طالبانو د لوی سفیر او فوقالعاده استازي په توګه د بلال کریمي باورلیک منل شوی دی.
د نوموړي په خبره، کریمي د دغو تشریفاتو مراسمو په ترڅ کې د چین د بهرنیو چارو له وزیر وانګيي سره هم لیدلي دي.
دا په داسې حال کې ده چې څو ورځې وړاندې بلال کریمي خپل باورلیک د چین د بهرنیو چارو وزارت د تشریفاتو عمومي رییس هونګلي ته سپارلی و.
له دې وړاندې په کابل کې د چین سفیر جاو شینګ خپل باور لیک د یو لړ مراسمو په ترڅ کې د طالبانو رییسالوزرا ته سپارلی و.
طالبان له بیجینګ سره نږدې اړیکې لري.
پر هېواد د طالبانو له دوو کالو ډېرې واکمنۍ راهیسې، لا هم کوم هېواد په رسمیت نه دي پېژندلي؛ خو ځينې هېوادونو له طالبانو سره نږدې ډيپلوماټیکې اړیکې ساتلې دي.
