بلخ کې د طالبانو امنیي قوماندانۍ په مزارشریف ښار کې د یو اوزبیکستاني وګړي د نیول کېدو خبر ورکړی دی.
یادې قوماندانۍ یکشنبه د سلواغې پر ۸مه ویلي چې دا اوزبیکستانی وګړی ۶۴ کلن دی او ظاهر نومېږي.
نوموړی د مزارشریف ښار د کابلبانک چوک په سیمه کې نیول شوی دی.
د قوماندانۍ په وینا، ظاهر له اوزبیکستان څخه بلخ ولایت ته د الکولي مشروباتو د قاچاق قصد درلود.
له بلې خوا په بلخ کې د مخدره توکو پر وړاندې د مبارزې مسوول ویلي چې دغه کس یو زر او ۱۰۰ بوتله الکولي مشروبات په یو سوزکۍ موټر کې ځای پر ځای کړي و او د حیرتان بندر له لارې یې مزارشریف ته د لېږلو قصد درلود.
د یادونې وړ ده چې د طالبانو مشر ملا هبتالله اخوندزاده په هېواد کې د مخدره توکو کرکېله، پېر او پلور بند کړی دی.
