په بدخشان کې د طالبانو ځايي چارواکي وايي چې د جرمني پراختیايي بانک او آغاخان دفتر په مالي مرسته د دغه ولایت د شغنان ولسوالۍ په «درمارخت» کلي کې یو ښوونځی جوړ شوی دی.
د شغنان ولسوالۍ د طالبانو د پوهنې رئیس عبدالعزيز ضيايي شنبې ورځ، مرغومي په ٢٣مه، ویلي چې دغه ښوونځى د ٢٦ ميليونه او ٩٥ زره افغانيو په لګښت جوړ شوى دى.
د دغه ښوونځي ودانۍ ۱۲ درسي ټولګي، اداري دفتر، د ښوونکو خونې او یو لابراتوار لري.
دغه ښوونځی د بدخشان ولایت په یوه لیرې پرتو سیمو کې جوړ شوی او د ۸۰۰ زدهکوونکو ظرفیت لري.
دا په داسې حال کې ده چې د طالبانو بیاځلې واکمنۍ له راتګ دوه کاله وروسته لا هم تر شپږم ټولګي پورته نجونې ښوونځيو ته د تګ اجازه نه لري.
په دې موده کې د طالبانو له لوري وړاندې شوي دلايل هېوادوال او نړۍواله ټولنې ته قناعت نه شي ورکولای.
