اسوشیټېډپرېس راپور ورکړی چی نړیوال مرستهرسوونکي بنسټونه په هرات کې د تېرکال زلزلهځپلو ته د مرستې له وړاندې کولو ستړي شوي دي.
نوموړې رسنۍ یکشنبه د تلې پر ۱۵مه د خپلو سرچینو په حواله راپور ورکړی چې زلزلهځپلي د نړیوالو او طالبانو د مرستې له کمښت سره مخ دي.
په دغه راپور کې راغلي چې طالبانو په لومړیو کې د روغتیایي مزکزونو په پرانیستلو سره د زلزلهّځپلو درملنه کوله، خو دا مرستې له یوې لنډې مودې وروسته ودرېدې.
نږدې یو کال مخکې د ریښتر په کچه ۶.۳ درجې زلزلې د هرات ځینې برخې ولړزولې.
د یو کال په تېرېدو سره لا هم په دې پېښه کې د مړو کره شمېر نه دی په ډاګه شوی.
په هرات کې د ۲۰۲۳ کال د اکټوبر ۷مې له زلزلې څو میاشتې وروسته ملګرو ملتونو د مړو شمېر ۱۵۰۰ کسان اعلان کړل.
طالبان وايي چې په دې پېښه کې څلور زره کسان مړه شوي دي.
د معلوماتو پر بنسټ، په دې پېښه کې تر ۱۲ زرو ډېر کسان زیانمن شوي دي.
