کونړ کې د طالبانو ځايي مسوولین خبر ورکوي، چې د دغه ولایت په وټه پور ولسوالۍ کې د یوې کورنۍ اته غړي مسموم شوي، چې له امله یې درې ماشومان مړه شوي دي.
د کونړ د اطلاعاتو او کلتور ریاست لپاره د طالبانو رییس مولوي نجیب الله حنیف وايي، دا پېښه تېره شپه جمعه، ۲۶ د زمري، د وټپه پور ولسوالۍ اړوند «ګمبیر» سیمه کې رامنځته شوې.
نوموړی زیاتوي، د دغې پېښې له امله د یادې کورنۍ درې ماشومانو خپل ژوند له لاسه ورکړی او پنځه تنه نور درملنې په موخه د ننګرهار حوزوي روغتون ته لېږدول شوي، چې ډاکټرانو یې روغتیايي وضعیت د ډاډ وړ بللی دی.
هغه وویل، چې تر اوسه د دې پېښې لامل نه دی څرګند، خو په خبره یې چې ځايي طالب مسوولین یې د لامل معلومولو په موخه سیمې ته ورغلي دي.
واک ته د طالبانو له رسېدو وروسته لومړی ځل دی، چې کونړ کې د یوې کورنۍ غړي مسموم او یو شمېر غړي یې مړه کېږي.
تر دې وړاندې د هېواد په یو شمېر نورو سیمو کې د بېلابېلو لاملونو له امله ګڼ کسان مسموم شوي، چې پر وخت روغتون ته د نه رسېدو له امله یې یو شمېرو خپل ژوند هم له لاسه ورکړی دی.
