د پاکستان په کراچۍ ښار کې له یوې زورورې چاودنې وروسته د دغه هېواد د بهرنیو چارو وزارت ویلي چې په دې پېښه کې دوه چینايي انجینران وژل شوي دي.
نوموړي وزارت دوشنبه د اکټوبر پر ۷مه په یوه بیان څرګنده کړې چې په دې پېښه کې يو چينايي انجنير ټپي شوی هم دی.
په بیان کې راغلي: «د کراچۍ هوايي ډګر ته څېرمه تېره شپه هغه ناوړه ترهګریز برید چې دوه چینايي انجینران یې ووژل او یو بل کس یې ټپي کړ، په کلکه غندو»
د پاکستان د بهرنیو چارو وزارت دا اقدام د دغه هېواد او چین پر «دوستانه» اړیکو برید بللی دی.
د بیان له مخې، پاکستاني ځواکونه به د دغه بريد د عاملانو په نیولو کې هېڅ ډول ناغیړي ونه کړي.
تېره شپه ناوخته پاکستاني رسنیو د کراچۍ هوايي ډګر ته څېرمه د یوې زورورې چاودنې راپور ورکړی و.
دا په داسې حال کې ده چې څو میاشتې مخکې هم د خیبرپښتونخوا په «بشام» سیمه کې په یوه ځانمرګي برید کې پنځه چینايي انجینران او د هغوی یو پاکستانی موټرچلوونکی وژل شوي وو.
