سرچینې وايي چې طالبانو په کابل کې د افغان خبري اژانس خبریال مهدي انصاري نیولی دی.
سرچینو دوشنبه د تلې پر ۱۶مه، منلې چې انصاري دوه ورځې مخکې د کابل ښار د ۱۸مې امنیتي حوزې اړوند د « پلخشک» په سیمه کې له دفتره کور ته د ستنېدو پرمهال نیول شوی دی.
د سرچينو د معلوماتو له مخې، طالبانو په پېل کې د انصاري له نیول کېدو ناخبري ښودلې؛ خو دوه ورځې وروسته يې د خبريال کورنۍ ته ویلي چې هغه له دغې ډلې سره بندي دی.
د یاد خبریال د نیول کېدو لامل نه دی څرګند.
پر افغانستان واک ته د طالبانو له رسېدو وروسته دغې ډلې پر رسنیو او خبریالانو ځپونکي محدودیتونه لګولي دي.
طالبانو تر دې مخکې هم ګڼ شمېر خبریالان او د رسنیو فعالان د بېلابېلو تورونو په پلمه نیولي او بندیان کړي دي.
شاوخوا یوه اوونۍ مخکې د طالبانو استخباراتو په غزني کې د خوشحال راډیو مسوول حکمت ارین نیولی و.
تر اوسه د دې خبریال د برخلیک په هکله معلومات نشته.
