د طالبانو سترې محکمې ویلي دي، چې په باميان ولايت کې یې درېیو کسانو ته د نامشروع جنسي اړیکو او غلا په تور سزا ورکړې ده.
د دې ډلې سترې محکمې پنجشنبه د زمري پر ۴مه، په یوې خبرپاڼه بیان کې ویلي، چې د تورنو کسانو له ډلې یو پر څلور کاله بند، یو پر پنځه کاله بند او یو پر شپږ میاشتې بند او ۳۵ دُرو محکوم شوی دی.
طالبانو تر دې وړاندې په اروزګان ولایت کې هم ۱۸ کسانو ته په ورته تورونو سزا ورکړې وه.
دا په داسې حال کې ده، چې د طالبانو لخوا په عام محضر کې د ملکي وګړو شکنجه کول د ملګرو ملتونو د بشري حقونو د کارپوهانو له سختو نیوکو سره مخ شوي او دغه بهیر یې د بشري حقونو د ارزښتونو خلاف بللی دی.
