د طالبانو بهرنیو چارو وزارت له ترکیې غوښتنه کړې چې دغه هېواد ته د ناقانونه کډوالۍ د مخنیوي لپاره افغانانو ته د ویزو د ورکړې بهیر اسانه کړي.
د طالبانو بهرنیو چارو وزارت سرپرست امیرخان متقي پنجشنبه د غبرګولي پر ۳مه د ترکیې کډوالو ادارې له رییس اتیلا توروس سره په لیدنه کې د نامنظمې کډوالۍ په مدیریت کې د دوه اړخیزو همکاریو پر پیاوړتیا خبرې اترې کړې دي.
نوموړي وزارت په یوې خپرې کړې خبرپاڼه کې ویلي چې په دې کتنه کې د «دواړو هېوادونو ترمنځ د اقتصادي اړیکو پر پراختیا او خصوصي سکټور پر ودې» هم خبرې شوې دي.
په خبرپاڼه کې د ترکیې کډوالو ادارې رییس په حواله راغلي چې افغان وګړي د نامنظمې کډوالۍ لامله له ګڼو ننګونو سره مخ دي او په وینا یې، پکار ده چې قانوني کډوالي پراختیا ومومي.
د یادونې ده چې په تېرو شاوخوا درېیو کلونو کې زرګونه افغانان له ناقانونه او قاچاقي لارو ترکیې ته تللي.
