د طالبانو د بهرنیو چارو وزارت سیاسي مرستیال شېرمحمد عباس ستانکزي په کابل کې د اذربایجان له سفیر سره په کتنه کې ویلي چې طالبان له نړۍ سره د «ښو اړیکو» غوښتونکي دي.
د طالبانو د بهرنیو چازو وزارت ویاند عبدالقهار بلخي یکشنبه د کب پر ۶مه په خپله ایکسپاڼه کې د عباس ستانکزي او په کابل کې د اذربایجان سفیر الهام نریمان محمدوف ترمنځ د کتنې خبر ورکړی دی.
په دې کتنه کې ستانکزي زیاته کړې چې طالبان د متوازنې او اقتصادي تګلارې په لرلو د ګاونډیو او سیمې هېوادونو په ګډون له ټولې نړۍ سره د «ښو اړیکو» غوښتونکي دي او په خبره یې، د خپل هېواد د اقتصادي حالت د ښه کېدو هڅې کوي.
ورته مهال، بلخي د محمدوف په حواله لیکلي چې اذریجان له طالبانو سره په بېلابېلو برخو کې د همکارۍ تیاری ښودلی دی.
د یادولو ده چې محمدوف د تېرې میاشتې په وروستیو کې امیرخان متقي ته په کابل کې د اذربایجان سفارت د پرانیستو لیک سپارلی و.
د اذربایجان د بهرنیو چارو وزارت ویبسایټ کې د خپرو شویو معلوماتو په حواله، د یاد هېواد پارلمان د ۲۰۲۰ کال د ډسمبر پر ۳۰مه په کابل کې د دغه هېواد د سفارت پرانیستل تایید کړي دي.
