د طالبانو او پاکستان ترمنځ د ترینګلتیا له زیاتېدو وروسته، په کندهار کې د طالبانو والي ملا شیرین اخند د دې ډلې او پاکستان ترمنځ د «ناندریو» ختمېدو په موخه اسلاماباد ته سفر کوي.
د پاکستان ډان ورځپاڼې د یکشنبې ورځ، د مرغومي په ۱۰ مه خبر ورکړی چې ټاکل شوې، ملا شیرین اسلاماباد ته د خپل سفر په ترڅ کې د پاکستان پوځ او بهرنیو چارو وزارت له لوړپوړو چارواکو سره لیده کاته وکړي.
ملا محمدعلي حنفي چې په ملا شیرین اخند مشهور دی، د طالبانو د مشرتابه له نږدې کسانو څخه دی او تر دې مخکې یې له اسلاماباد او ټيټيپي سره نږدې اړیکې لرلې.
هغه د طالبانو د واکمنۍ په لومړۍ دوره کې د دې ډلې د پخواني مشر ملا محمدعمر د امنیت مسوولیت په غاړه لرلو.
اسلام اباد ته د دغه طالب چارواکي د سفر کره نېته نه ده معلومه، خو ډان ورځپاڼې لیکلي چې نوموړی به د جنورۍ په میاشت کې پاکستان ته سفر وکړي.
طالبانو پاکستان ته د دغه چارواکي د سفر په اړه څه نه دي ویلي.
د پاکستاني پوځ پر ضد د ټيټيپي وسلهوالو له څو وژونکو بریدونو وروسته، د طالبانو او اسلاماباد ترمنځ اړیکې په ښکاره ډول خړې شوې دي.
د پاکستان حکومت ادعا کوي چې طالبانو په افغانستان کې د ټيټيپي جنګیالیو ته پټنځایونه ورکړي دي.
له دغو کړکېچونو په دوام کې طالبانو د جمعیت علمای پاکستان له مشر څخه غوښتي و چې کابل ته سفر وکړي څو په پاکستان کې د دې ډلې پر ضد د تبلیغاتو مخه ونیول شي.
