د مقاومت جبهې د بهرنیو اړیکو مسوول علي میثم نظري وایي، چې د لسګونو زرو بهرنیو ترهګرو جنګیالیو په خوندي کولو سره، طالبانو د افغانستان حاکمیت او ځمکنۍ بشپړتیا تر پښو لاندې کړې او د بهرنیو بریدونو لپاره یې لاره هواره کړې ده.
هغه پر اېکس پاڼه کاږلي، د دغو شرایطو د رامنځته کېدو مسوولیت د طالبانو په غاړه دی چې د دغو سرغړونو د رامنځته کېدو اجازه ورکوي.
هغه زیاتوي: «د افغانستان هیڅ وګړی د کوم بهرني هېواد لهخوا د خپل هېواد له ځمکنۍ بشپړتیا څخه سرغړونه نه مني.»
د هغه د لیکنې په وروستۍ برخه کې راغلي، د دې لپاره چې د نورو سرغړونو او تاوتریخوالي مخه ونیول شي، د افغانستان په هره برخه کې دې خلک له مقاومت سره یوځای شي او د حاکمیت، ځمکنۍ بشپړتیا او خپلواکۍ د بېرته راوستلو لپاره دې خپلې هڅې ګړندۍ کړي.
