په غور کې د طالبانو سيمهييزو چارواکو له خوا د يوې نجلۍ له تښتونې وروسته ځايي اوسېدونکي وايي چې دغې ډلې په عام محضر له دوی سره ظلم کړی دی.
د نورک سیمې اوسېدونکو او د تښتول شوې نجلۍ خپلوانو، پنجشنبه د وري پر ۹مه، رسنی ته ویلي چې امریکایانو هم په عام محضر کې له دوی سره داسې ظلم نه دی کړی.
د دې نجلۍ له خپلوانو یو کس چې نه غواړي نوم يې په ډاګه شي وايي، هغه له يوه سړي سره د ۷۰۰ زره افغانيو مهر په بدل کې جبري واده ته اړ کړای شوه.
د سرچينې په خبره، دا نجلۍ د پسابند ولسوالۍ د امنیه قوماندانۍ امر له يوه خپل سره نکاح ته اړ شوې او د واده ۳۵۰ زره ولور له ورکړې پرته د طالبانو ولسوال، امنیه قوماندان او د دغې ډلې یو شمېر نورو سیمهییزو چارواکو د پسابند ولسوالۍ د نورک پر کلي برید کړی او دغه ځوانه نجلۍ یې تښتولې ده.
سرچينه زياتوي چې په یادې ولسوالۍ کې د ولسوال، امنيه قوماندان، د استخباراتو مدير او پاتې نور پرسونل په ګډون د طالبانو سيمهييزو قوماندانانو د محکمې له حکم پرته دا کار کړى دى.
بل خوا د پسابند ولسوالۍ د نورک کلي اوسېدونکي وايي چې په دغې ولسوالۍ کې ځايي طالبانو د ملګرتیا اړیکو پر بنسټ د دوی پر «ناموس» تېری کړی دی.
رسنی هڅه وکړه چې په دې هکله د غور ولایت د سیمهییزو طالب چارواکو نظر هم ترلاسه کړي خو بریالۍ نه شوه.
یو ویډیويي کلېپ چې رسنی ته رسېدلی هم ښيي چې طالبان دا ځوانه نجلۍ او د هغې د کورنۍ غړي وهي.
دا په داسې حال کې ده چې د تېر کال په مرغومې میاشت کې هم طالبانو په تخار کې یوه ۱۴ کلنه نجلۍ وتښتوله او د خپلې ډلې یو کس ته یې په نکاح کړه.
اړوندې لیکنې :
- په هرات کې د يوې ځوانې نجلۍ سوځېدلی مړی موندل شوى
- له بوډا سره جبري نکاح؛ په کندهار کې یوې ځوانې نجلۍ ځانوژنه وکړه
- طالبانو په بلخ کې یو هلک او یوه نجلۍ په دورو وهلي
- په کندهار کې دوه ځوانې نجونې په اوبو کې ډوبې شوې
- یوې نجلۍ خوبونه (د ښوونځیو پرانستلو له تمې څخه نا هیلي) ۱
- د یوې نجلۍ خوبونه(د ښوونځیو پرانستلو له تمې څخه تر ناهیلي) (پای)