د طالبانو تر کنټرول لاندې افغاني سرې میاشتې ټولنې اعلان کړی چې په تېره یوه میاشت کې یې د ننګرهار ۴۲ زره ۱۸ اوسېدونکو ته روغتیايي خدمتونه وړاندې کړي دي.
نوموړي بنسټ دوشنبه د وږي پر ۲۶مه په اېکسپاڼه کې لیکلي د ۲۰ زرو ناروغانو د تشخیص ترڅنګ، یو زرو ۸۴۷ ښځو او ماشومانو هم بېلابېل واکسینونه ترلاسه کړي دي.
د سرې میاشتې ټولنې د معلوماتو پر بنسټ، په دې موده کې یو زرو ۷۶۵ امېندواره ښځو ته خدمتونه وړاندې شوې دي.
همداراز دغې ادارې په تېره یوه میاشت کې د ننګرهار ۷۱۵ اوسېدونکو ته کورنۍ مشورې او لارښوونې وړاندې کړي دي.
د معلوماتو له مخې، د بېلابېلو ناروغيو په هکله د دغه بنسټ د پوهاوي له پروګرامونو څخه تر اوسه ١٦ زره ٥٨ کسان برخمن شوي دي.
دا په داسې حال کې ده چې پر افغانستان واک ته د طالبانو له رسېدو وروسته هېوادوالو په تېره بیا کلیوالو ته د روغتیايي خدمتونو په وړاندې کولو کې کموالی راغلی دی.
خلکو ته د خدمتونو په وړاندې کولو کې د کموالي لامل د طبي تجهیزاتو او کادرونو نشتوالی ښودل شوی.
